【時報訊】Emily噚日喺度提過，有的士業界原本打算號召約600部的士噚日去政府總部一帶停擺，抗議政府無嚴懲「白牌車」，最後因為警方暗示臨近中秋同國慶而撤回申請。警方噚日向Emily回應呢件事，無直接解釋活動搞唔到同中秋、國慶係咪有關，話上星期四（21日）收到兩個團體通知，於是主動聯絡對方會面，解釋600部的士同時停擺對港島區緊急服務同繁忙交通嘅影響。
活動由香港的士小巴商總會、的士車行車主協會發起。警方話會面期間有向主辦方表明佢哋享有表達意見嘅權利，但同時提醒需要考慮其他道路使用者嘅安全同權利，最後主辦方自行決定取消活動。警方重申處理公眾活動通知時會繼續按法律，以公平、公正、不偏不倚嘅態度處理，但各主辦單位都有社會責任，確保公共秩序和公共安全。
香港的士小巴商總會理事長周國強就話會繼續同警方聯絡，了解下幾時先可以加大力度抗議。
