华侨网 娱乐资讯 溫拿鬥曬親情 譚詠麟兒子越洋睇直播捧場 鍾鎮濤偕女獻聲 陳友三代同堂jam歌

溫拿鬥曬親情 譚詠麟兒子越洋睇直播捧場 鍾鎮濤偕女獻聲 陳友三代同堂jam歌

鍾鎮濤(左)跟19歲女兒鍾懿(右)合唱,表現興奮。(攝影:劉永銳)
鍾鎮濤(左)跟19歲女兒鍾懿(右)合唱,表現興奮。(攝影:劉永銳)
陳友(左二)三代同堂jam歌,兒子(右)彈結他,他跟一對孫仔孫女合唱《Sha La La La》,小朋友毫不怯場,十分可愛。(攝影:劉永銳)
陳友(左二)三代同堂jam歌,兒子(右)彈結他,他跟一對孫仔孫女合唱《Sha La La La》,小朋友毫不怯場,十分可愛。(攝影:劉永銳)
溫拿五虎珍惜相聚時刻,視彼此為一生一世的好兄弟。
溫拿五虎珍惜相聚時刻,視彼此為一生一世的好兄弟。
鍾鎮濤一度忍不住眼濕濕。(攝影:劉永銳)
鍾鎮濤一度忍不住眼濕濕。(攝影:劉永銳)

【明報專訊】《溫拿情不變.說再見Farewell with LOVE演唱會》首場前晚於歡笑聲下完騷,溫拿五虎譚詠麟(阿倫)、鍾鎮濤(阿B)、陳友、彭健新(健仔)及葉智強(阿強)講明今次是樂隊與歌迷的告別派對,眾人沒有表現太過傷感,只有阿B一度唱到眼濕濕。阿B和陳友趁溫拿最後一次演唱會,安排下一代上台與歌迷共聚,阿倫則表示兒子譚曉風事業為重不在港,但會睇直播捧場。

記者:林祖傑

攝影:劉永銳

溫拿在演唱會不止獻唱多首名曲,還安排個別合唱和獨唱,阿倫及阿B合唱時自稱是「實力派天花板頂流天團」。五虎各自在台上分享感受,阿倫表示疫情令溫拿經歷好多,明白珍惜好重要,「每次溫拿相聚都好珍惜,今(前)日見到幾名兄弟狀態大勇,中氣十足,製造咁多歡樂畀大家,做到離而不休、別而不傷,好兄弟係一生一世的」。

樂悠卡拉近彼此距離

阿B表示向來好重視家庭,溫拿就是他的家庭成員,當遇上挫折及煩惱,想起溫拿和粉絲就很踏實。陳友笑道:「阿倫和阿B後生時真係好靚仔,當時見到有粉絲衝埋嚟,都係同我擦身而過,自己知自己事,我又瘦又四眼又鶴咁,但個天好公平,現在大家都揸樂悠卡,我們已不是好大距離,好感謝個天,世界60幾億人,可以讓我們5個走埋一齊。」

健仔稱當年父親想他當裁縫繼承父業,幸遇到溫拿幾名兄弟,令他在音樂上有好大成就,以及有優質生活,證明冇入錯行。阿強承認每次回香港感覺似回家,笑稱:「以為要畀家用,原來唔使畀,仲有得收。」

阿B特別安排19歲女兒鍾懿上台獻唱,與母親范姜如餅印的鍾懿穿上黑色連身短裙獨唱《Bohemian Rhapsody》及《剪愛》,表現淡定的她說:「好開心,好激動來到紅館,記得6歲在紅館唱歌,爸爸叫我練三字經,練得唔好唔可以上台唱歌。好感恩來到咁特別嘅演唱會,因為是溫拿告別演唱會,好唔捨得溫拿,溫拿睇住我長大,我唔止聽他們唱歌,還見到他們對工作熱情和努力,以及帶畀大家歡樂,因為這個原因,我好鍾意唱歌表演。」

阿B撐鍾懿當歌手

阿B不忘向鍾懿寄語,「第一次聽你認認真真去唱,台下觀眾都幾鍾意你,做職業歌手條路好崎嶇,唔容易,你做歌手爹哋一定支持你,但要以學業為重,兩樣都要畀心機」。陳友安排外地回港的兒子及孫仔孫女上台,由兒子彈結他,孫仔孫女與他合唱《Sha La La La》,十分可愛,陳友說:「我想請個仔和孫同大家見面影張相,等個孫大個知道,原來爺爺隊Band係咁巴閉。」

講明唔准喊 阿B「犯禁」

騷後溫拿五虎受訪,問是否依依不捨?阿倫說:「講咗每場都當最後一場咁做,叫大家唔好喊。」阿倫稱自己有好多東西要記,沒有分心,hold得住冇喊,笑稱眼濕濕是阿B的事,並表示目前狀况OK,把聲已康復至八成半,還得戚道:「六成都夠唱啦。」

溫拿強調今次是正式告別,要趁齊人、大家有頭髮有牙、行得走得開騷,亦都要為歌迷着想,始終年紀會大,粉絲會和他們一齊老,「我哋都唔會再係Rock show,不會像小鮮肉咁跳來跳去,𠵱家係罐頭肉、午餐肉」。完成香港演唱會後,溫拿已計劃到澳門、內地及星馬舉行巡迴演唱會。

陳友首次見孫女

問到阿B是否批准鍾懿入行當歌手?阿B表示鍾懿仍在英國修讀導演課程,一定要先完成學業,再視乎女兒意願。陳友稱因疫情關係,自己是第一次見在美國出世的孫女,大讚兩個孫不怯場,他說:「個仔話我冇乜嘢留畀佢,不如留一個經歷畀個孫,日後都係一個美好回憶。」阿倫即揶揄陳友,「有車有樓又有船,咁都話冇嘢留畀佢?」問阿倫為何不效法其他隊友安排兒子上台?他說:「咁客氣呀,佢有睇,畀咗條link佢越洋睇,事業為重。」

■更多娛樂猛料 ﹕ol.mingpao.com

免责声明:本文仅代表作者个人观点,与华侨网无关联。其原创性及文中陈诉内容未经本网证实,对本文内容、文字的完整、真实性,以及时效性本网部作任何承诺,请读者自行核实相关内容。如发现稿件侵权,或作者无意愿在华侨网发布文章,请版权拥有者通知华侨网处理。

讚游學修成熟有演戲天分 黃秋生自嘲好窮再開班授徒吸金


联系我们

联系我们

514-3979969

邮箱: cpress@chinesepress.com

工作时间:周一至周五 10:00-16:00,节假日休息
关注微信
微信扫一扫关注我们

微信扫一扫关注我们

关注微博
返回顶部