前財政司長曾俊華（中）偕家人觀看周潤發（右一）主演電影《別叫我「賭神」》，並與發哥和發嫂（右二）自拍，大家笑容滿面。（曾俊華fb圖片）
【時報訊】前財政司長曾俊華噚日喺佢嘅社交媒體發文，話最近「戲癮發作」，睇咗3部電影，包括《教父冇限耆》、《本日公休》，同埋由周潤發（發哥）主演、跑勻油尖旺宣傳嘅《別叫我「賭神」》，咁啱3部戲都有理髮師嘅角色。
話《別叫我「賭神」》充滿人生道理
曾俊華話，雖然發哥戲中飾演髮型師，但故事主軸唔係圍繞呢個職業或任何賭博，反而係講述父子情同人生，佢形容電影「好感性、充滿人生道理」，仲話發哥「一人擔起晒成套戲」，支持者一定好滿意。佢又話成部電影製作認真，由莊文強編寫嘅電影劇情發展流暢，表現一流。
至於由羅拔迪尼路主演嘅《教父冇限耆》，曾俊華話雖然有好多搞笑場面，但同時帶出咗「家庭唔單止係重要，直頭係一切」嘅核心信息。佢亦對由影后陸小芬主飾嘅台灣片《本日公休》有深刻感受，認為自己同主角一樣，淨係做鍾意和值得嘅事，「即使有多多錢我都唔喜歡被迫去做唔喜歡嘅事」。
相關字詞﹕曾俊華 周潤發（發哥）
免责声明：本文仅代表作者个人观点，与华侨网无关联。其原创性及文中陈诉内容未经本网证实，对本文内容、文字的完整、真实性，以及时效性本网部作任何承诺，请读者自行核实相关内容。如发现稿件侵权，或作者无意愿在华侨网发布文章，请版权拥有者通知华侨网处理。
