【時報訊】上年7月1日，肝臟移植專家盧寵茂正式加入政府出任醫務衛生局長，佢噚日喺網誌〈七一杏林 回歸初心〉表示，過去一年承擔人生最光榮使命，又憶述自己喺1985年7月1日從港大醫學院畢業，成為實習醫生走入瑪麗醫院內科2A病房，白袍掛起「盧寵茂醫生」名牌，經歷咗第一次「六日四call（當值）」、「on-call 36小時」等；一年後嘅7月1日，佢成為註冊醫生加入瑪麗醫院接受外科培訓，第一次縫傷口、切盲腸，從此與手術刀結緣。
盧寵茂話，每年七一係香港杏林世代交接重要日子，今年兩間醫學院有500幾名醫科生成為實習醫生，亦有500幾名醫生完成實習展開專科之路，特別係公營醫療面對人手短缺，每個新力軍都帶來新力量。盧感謝佢哋承擔維護市民健康責任，亦對佢哋寄予厚望，期望學以致用治病救人。佢形容各人行醫之路或有唔同，但守護健康初心一致，但願七一杏林回歸初心，花開結果。
相關字詞﹕盧寵茂
