【時報訊】立法會每年都會同六大慈善機構代表茶敘，包括東華三院、保良局、九龍樂善堂、博愛醫院、仁濟醫院、仁愛堂，但疫情期間要暫停，噚日立法會復辦茶敘，約130個嘉賓同46個議員出席，創歷史新高。立法會主席梁君彥提到，各個慈善機構喺疫情期間以實際行動救急扶危，例如仁濟醫院上年緊急撥款1000萬元設立「仁濟抗疫基金」，九龍樂善堂就成立社區飯堂等。
梁君彥又提到，各慈善機構積極配合政府，推動基層醫療、推展社會房屋計劃、為年輕人提供多元教育服務等，又表揚各大慈善機構扎根香港，一直同政府、其他公營機構互相補位，多年來貢獻巨大。梁君彥仲應承各慈善機構，日後如果要舉辦特別嘅籌款活動，可隨時聯絡立法會秘書處，獲行管會同意後，仲可以捐出有齊歷任兼現任特首同立法會主席簽名嘅「香港特別行政區成立25周年」首日封做慈善拍賣。
