【時報訊】香港有70幾萬人患糖尿病，即係每10人就有1個。中大醫學院研究顯示，糖尿病人用「醫健通」手機程式嘅「健康管理」功能後，成功控制糖化血紅素（HbA1c）至理想水平嘅機率，比無用醫健通嘅病人平均高四成。研究團隊話數據反映醫健通有助病人自我管理血糖水平，仲話要鼓勵老人家使用。
血糖達標機率增四成
政府喺2021年首季推出「醫健通eHealth」App，同年7月增設「健康管理」功能，用家可自行記錄血壓、血糖指數等數據。中大研究團隊前年1月至舊年5月收集咗超過10萬個糖尿病患者嘅數據，約3.2萬人有用醫健通，當中1744人同時使用健康管理功能。數據顯示，用呢個功能嘅病人，成功控制HbA1c至理想水平嘅機率比無用醫健通嘅病人平均高四成，年輕女性糖尿病人嘅相關機率更高六成。
負責研究嘅中大醫學院賽馬會公共衛生及基層醫療學院教授黃至生話，糖尿病人每次覆診要帶好多文件，部分未必帶得齊資料，個App嘅健康管理功能就可以幫醫護即時查番數據，可以更對症下藥，建議港府加強推廣醫健通。
