【時報訊】立法會體育、演藝、文化及出版界議員霍啟剛早前接受無綫電視節目《好睡好起》訪問，經港大睡眠實驗室測試後，證實患有中等程度嘅睡眠窒息症。佢噚日喺facebook突然「報平安」，話近日突然有大量內地朋友叫佢小心身體，甚至好凝重咁話有咩幫手要隨時出聲，搞到佢滿頭問號，睇一睇內地網上新聞，就「當堂嚇一跳，然後得啖笑」喎！
咁多朋友關注，真係多得一班內地「標題黨」，Emily喺內地網上搜尋「霍啟剛」，見到唔少標題提到佢「確診此病症」、「嚴重可致命」、「病入膏肓」嘅字眼，甚至寫到佢昏迷住院，但就極少標題提到睡眠窒息症，單睇標題真係會嚇親。
霍啟剛叫大家真係唔使擔心，強調自己好健康，仲標籤話「我唔係病危」、「我依然係龍精虎猛」，仲希望大家都要注意身體、關注睡眠質素。
