【時報訊】早排圖書館將大批書籍下架，其中就包括前中大學生會會長、現任深水埗民政專員黃昕然有份寫嘅《同途殊歸：前途談判以來的香港學運》（圖）。噚日民主黨區議員袁海文喺深水埗區議會開會時，就當住黃昕然面前問「一哥」警務處長蕭澤頤，管有或者出售下架書籍係咪違反煽動罪，仲特登提埋《同途殊歸》，話有人講第三章關於八九民運同香港學運好值得睇，唔知專員有無保留著作。
蕭澤頤未睇過唔評論 黃昕然無發言
蕭澤頤就答：「我都未睇過本書，我唔想就住個別一啲事件，我就咁快作出任何嘅意見。」黃昕然就無發過言。本報就睇過公共圖書館網上檢索系統，係無呢本書嘅紀錄。
今年深水埗區議會兩次想傾改革區議會制度問題，黃昕然都帶隊離場。其實佢讀書嗰時好積極參加學生運動，曾經做過中大新亞書院學生會同中大學生會幹事會會長。《同途殊歸》係黃昕然同埋學者蔡子強、莊耀洸、前支聯會副主席蔡耀昌喺1998年所寫，佢哋仲合編過一本《叛逆歲月：香港學運文獻選輯》。
相關字詞﹕深水埗區議會
