【時報訊】近年唔少較年輕政界人物去報讀清華大學高級公共管理碩士（EMPA），民建聯立法會議員梁熙（圖）係第一屆學生，早於2018年修讀課程，早已畢業，但延至噚日先參加畢業禮。梁熙話自己係當年同班嘅優秀畢業生，取得優秀論文獎，課程早於2021年6月舉行畢業禮，但因新冠疫情，典禮喺香港分會場以連線方式舉行，噚日校方再辦實體畢業禮，梁熙話意義重大，所以專程飛上北京參加，見吓同學朋友，逗留唔夠24小時就即日返港。
梁熙話當年畢業論文係對比香港同澳門嘅國民教育，話研究下得知香港過去只得公民教育，未如澳門一直推動國民教育。
政務司長陳國基噚日亦喺清華大學高級公共管理碩士香港政務人才項目畢業禮上以視像致辭。佢話自己都係清華大學畢業生，當年喺北京工作時，有幸到法學院進修並取得學位。陳國基話，清華嘅高級公共管理碩士香港政務人才項目，係內地首個面向香港招生嘅公共管理碩士項目，讚課程融合理論和實踐，涵蓋香港、國家以至國際治理經驗，有助培育學員成為植根國家、面向世界、知國情、懂港情嘅高級公共管理人才。
相關字詞﹕陳國基 清華大學高級公共管理碩士 清華大學 梁熙
