【時報訊】前憲制事務司施祖祥去年離世，前財政司長曾俊華噚日話，上周五（23日）出席施祖祥嘅追思會，見到好多舊朋友，包括中英聯合聯絡小組英方代表包雅倫，3名立法會前議員李柱銘、楊森及涂謹申，以及一班上咗年紀嘅政務官，形容佢哋喺佢眼中係「真正好打得嘅官員」，仲話：「見到佢哋，感覺呢個就係過去咗嘅美好時代，不勝唏噓，唔知呢啲感慨，係唔係我哋呢啲比較資深嘅人，先至有嘅呢？」
曾俊華話，呢個場景令佢諗起一段《聖經》經文：「那美好的仗我已經打過了，當跑的路我已經跑盡了，所信的道我已經守住了。」
曾俊華又提到，上周參觀咗兩名藝術家嘅個人作品展，包括中國當代藝術家商成祥嘅作品，其中佢最欣賞嘅一個系列，係用disco場地掛喺舞池中央高位嘅玻璃鏡面球做主題，「從多幅畫作你可以見到，從一個高貴嘅環境，逐漸演變成頽破嘅景象，香港朋友睇到嘅話，或者都會有所觸動」。另一展覽係英國現代藝術家Ann Carrington喺香港舉行嘅首個個人展覽，曾俊華話參觀者有機會睇到其4幅向已故英女王致敬嘅作品，作品用咗大量衫鈕砌成伊利沙伯二世喺英國郵票上面嘅頭像。
