【時報訊】中華總商會會長蔡冠深嘅太太蔡關頴琴（圖）早前獲中大頒發榮譽院士，日前蔡太接受中大訪問時，提到喺2008年，向中大文物館捐贈已故散文家、魯迅弟弟周作人於1961年寫畀香港友人、散文家高伯雨嘅親筆函，蔡太之後收到時任文物館館長林業強嘅答謝函，當中附上兩頁周作人親筆函嘅背景。
蔡太喺訪問中提到，自己對書畫有興趣，曾修讀中國文學，好喜歡魯迅，又話對周作人個名好熟悉，所以聽到拍賣會有呢封親筆函，就喺1998年10月買下。至於點解會捐贈畀中大，佢話因為參觀過中大文物館，覺得好專業，認為將周作人親筆函放喺文物館好適合。
林業強喺訪問提到自己對周作人嘅散文好有興趣，形容為清雅淡逸，而且以前都有讀過高伯雨嘅著作，所以當年收到親筆函後，花咗兩三日時間考證，蔡太諗番收到回信後覺得好感動，認為中大對文物好尊重。
