【時報訊】器官捐贈機制近期因執法部門介入調查有無人不當干擾，備受社會關注，衛生署噚日喺立法會大樓擺攤位，向議員、職員同訪客推廣器官捐贈文化，同回答有關捐贈嘅問題。
近30名唔同黨派唔同年紀嘅議員都有到場支持，部分議員即場登記或再次確認捐贈意願，例如實政圓桌田北辰、自由黨張宇人、建測規園界謝偉銓、工聯會陳穎欣、選委界別陳沛良、勞聯林振昇等，其中工聯會鄧家彪同傳媒話自己已登記過3次咁多，但唔怕重複登記。亦有唔少議員話早已登記，例如民建聯陳克勤同選委界別簡慧敏。
盧畀「心」喻受惠女嬰 鄧家彪登記過3次
醫務衛生局長盧寵茂致辭時，形容等緊器官移植嘅病人好似鐵達尼號嘅絕境咁，而器官移植係救生艇同唯一希望。盧局長又帶領議員做「心心」手勢，佢話係諗起上年12月女嬰受惠跨境器官互助，「佢嘅心心，仲喺度跳動緊」。
立法會主席梁君彥就代表立法會簽署推廣約章，承諾推動器官捐贈公眾教育，推廣器官捐贈嘅文化。公務員事務局長楊何蓓茵都喺facebook話，香港遺體捐贈屬自願，盼望願意而未登記嘅公務員盡快行動。
