【時報訊】「馬拉松式」連日開會嘅《2023年區議會（修訂）條例草案》法案委員會噚日繼續喺立法會舉行，會議已經進入逐項審議階段，議員提問亦難免咬文嚼字，為個「的」字擺位都要討論一番，確保條文寫得夠清楚。不過，噚日有多條中文條文都被唔同議員形容「睇唔明」，其中保安局前局長黎棟國都話，如果法律條文要經過解釋先明白意思，一般選民會產生好大疑慮。
法案委員會主席、本身係大律師嘅廖長江仲笑言，有政府高層同佢講，係咪特登要寫到大家唔明，律師先有生意做，隨即引來會議室一片笑聲。廖長江就覺得，呢個說法係唔啱，「因為律師都睇唔明」，佢話理解起草法例時係用英文，再翻譯成中文，所以意思上有時會有落差，希望律政司嘅法律草擬科可以研究有冇改善空間，「大家比較容易睇得明啲」。
