【時報訊】政府同中大體育運動科學系合作做「全港社區體質調查」，文體旅局噚日提交調查結果，發現超過一半（53.8%）年齡介乎17至79歲嘅香港市民，體能活動量未達世衛建議。7至11歲兒童同12至16歲青少年唔達標嘅百分比，分別係66.3%同50.7%。
上次同類調查係2012年，今次調查就喺2021年7月至2022年12月期間收集8419個樣本。至於點解咁多人體能活動量不足，唔同年齡層嘅原因都各有不同，例如兒童主要因天氣差、功課太忙、身心太疲累；青少年就話會肌肉酸痛，或者因為唔夠時間；至於17至59歲嘅成年人就話係無時間、疲倦、懶惰。
調查仲有啲有趣發現，有85.1%嘅女童認為自己有足夠體能活動量，但其實80.7%嘅女童都唔達標，證明大家對體能活動量係咪足夠嘅認知有落差；而成年人平衡能力比2012年調查差咗，報告建議為呢一代嘅成年人提供額外平衡訓練。至於肥胖問題，33%兒童同27.7%青少年被識別為超重或肥胖，其中與2012年相比，今次受訪青少年嘅皮下脂肪更多呢！
