【時報訊】大律師公會早前訪問北京，仲恢復同北京大學法學院搞普通法課程，畀北大學生認識香港同普通法制，係2018年後第一次。公會主席杜淦堃（Victor）同Emily講，過去兩個月十幾名大律師周末上北京，幫學生上堂，同埋遴選資助一啲北大生短暫來港「跟吓師父」幾個禮拜。Victor話現已傾緊下年課程，由公會嘅人喺北大度接手教番，由於要認識涉外法律，可能都試吓由普通話轉用英語教書。
Victor話，北大畀大律師公會自由度，無話乜嘢唔可以教，例如有觸及司法覆核，而模擬法庭個案更加係用Victor自己輸咗嘅個案做情境題。佢又話，過去都試過有北大學生讀過普通法課程之後嚟香港做大律師或事務律師。
除咗公會同北大課程外，Victor話，內地司法部牽頭下，都組織香港大律師同律師去內地人民大學、對外經貿大學同北大，向內地執業律師教授普通法，主要涉及商業同仲裁課程。佢個人感覺，內地企業走出去下，更需要認識普通法，感覺整體內地對普通法「感覺係未見過咁着重」。
