【時報訊】前財政司長曾俊華自從離開政府後有唔少搞作，日前佢就話，由於社會上問題太多，希望可以繼續用自己嘅知識同經驗去推動社會服務，包括參與社企「Hatch 合廠」嘅活動。「合廠」係共享工廠，曾俊華話理念係希望向婦女尤其係要肩負照顧家庭同仔女責任嘅媽媽，提供一個具彈性嘅工作模式，或者係短期職業發展機會，令有一定才能嘅婦女可以發展所長，而且喺入面工作嘅媽媽可以帶埋仔女返工。
另外，曾俊華話去咗一個關於AI對未來教育作用嘅講座，佢認為AI係幫到學生學習同埋幫到老師教學嘅工具，今時今日好難唔用，認為老師要好好教導學生點樣正確利用AI。佢亦認為，AI從愈來愈多嘅資料中學習，只會變得愈嚟愈叻，唔同地方嘅AI提供嘅答案都會好唔同，所以學生更需有批判思考。
相關字詞﹕曾俊華
