【時報訊】鄉議局噚日舉行換屆選舉，主席劉業強同副主席林偉強自動當選連任，另一副主席位置就有競爭，由沙田鄉委會主席莫錦貴以71票擊敗獲55票嘅大埔鄉委會主席林奕權，成功連任。劉業強盼各方在選後團結做事，又話知道鄉郊居民對大型發展有意見，盼大家顧全大局，又促請政府同鄉議局協調。
換屆選舉共127名鄉議局成員出席，正副主席3席分別喺新界三約（大埔約、元朗約、南約）各選一人出任。代表元朗約嘅劉業強同代表南約嘅林偉強無競爭下連任，大埔約就由莫錦貴擊敗林奕權當選。正副主席任期同係4年。
劉業強話對連任非常開心，會帶領鄉議局及全體鄉民跨越100周年，並就北部都會區等項目支持及配合政府。佢相信政府有意放寬祖堂地發展限制，希望喺今屆政府任內落實，配合北都發展。莫錦貴話過去幾年跟從劉業強嘅工作「大家見得到」，未來將繼續以同一方向做事。上屆鄉議局換屆選舉大埔約同樣有競爭，由莫錦貴、林奕權及西貢北約鄉委會主席李耀斌競逐，莫錦貴當時僅以1票之微險勝林奕權。
