【Emily】佛誕嘉年華人數新高管牧去浴佛大典

管浩鳴牧師（前右）著住基督教神職人員嘅羅馬領，出席浴佛大典暨「祝福香港」吉祥法會，仲同篤信佛教嘅港區人大鄺美雲（前左）合照。（管浩鳴fb圖片）

喺維園舉行嘅「佛誕浴佛暨蔬食文化嘉年華」特意為今年2月圓寂嘅星雲大師設展區，市民可以用便條紙寫下心願，貼喺展板。（香港佛光道場fb圖片）

【時報訊】噚日佛誕有多場慶祝活動，其中喺維園就有「佛誕浴佛暨蔬食文化嘉年華」，大會話參加人數係歷屆最多，數以萬計市民到場浴佛、撞鐘、祈福許願等，仲有逾百攤位推廣素食、義賣等，現場仲為今年2月圓寂嘅星雲大師特設展區，畀市民了解大師嘅事蹟。出席開幕儀式嘅民青局長麥美娟話政府支持宗教發展，又感謝大會安排，畀市民贍禮浴佛之外，同時成為旅客景點。

另外，香港佛教聯合會都舉辦咗浴佛大典暨「祝福香港」吉祥法會，身為牧師嘅立法會議員管浩鳴都有出席。出席同一活動嘅政務司長陳國基就借題發揮，喺facebook提到近年發生嘅一啲事「引起了香港和內地同胞的矛盾，令我感到非常痛心」，話噚日係佛誕，「中國人血濃於水，應該團結一致」，又話佛教強調「眾生皆平等」，尊重包容、和諧共處、團結一致，先係國家之福。

相關字詞﹕管浩鳴國泰機組人員違規佛誕