【時報訊】公民黨將會喺本周六議決是否清盤，身為公民黨創黨成員嘅行會成員、民主思路召集人湯家驊（Ronny）噚日就想當年，提到自己有份創黨，好着緊，大家仲喺佢屋企同意組黨，對於公民黨如果最終解散感到可惜。Ronny認為，社會環境改變，公民黨嘅生存空間尷尬，形容「你話佢理性又唔係理性，你話佢激進又唔係激進」，「去到某啲位（解散）係無可避免」。不過佢話唔想幸災樂禍，所以想留番之後先再講喇。
倡讀law必修憲法 請內地教授教
Ronny日前率領民主思路香港政治及行政學苑學生交流團北上，同國務院港澳辦主任夏寶龍喺北京會面，佢話夏寶龍冇提及同遊行相關嘅事項，不過就有提到香港嘅特殊地位，喺中美關係下係相當敏感嘅地方，因此《港區國安法》特別重要。佢仲話，想約見3間有籌辦法律學科嘅大學，包括港大、中大同埋城大，希望將《憲法》設為必修法律課程科目，建議請內地客席教授嚟香港執教。
