【明報專訊】香港迪士尼同香港芭蕾舞團首次合作推出嘅「StellaLou夢想起舞吧」，上星期起已經喺迪士尼故事劇場開騷，而喺上周五（7號）至噚日，迪士尼安排咗3場「輕鬆自在場」特別場次，邀請咗超過2000名有特殊學習需要（SEN）嘅兒童同其屋企人睇表演，仲貼心地喺音效同燈光方面做咗特別安排，令呢班小朋友睇得安心。
降低強烈音效燈光減刺激
迪士尼度假區娛樂事務及服裝部製作總監虞楟話，「輕鬆自在場」為呢班小朋友提供特別安排，例如表演時會降低強烈音效、燈光同影像效果，劇場外亦設立安靜區（Chill-out Zone），如果佢哋喺欣賞表演時出現情緒不穩定，可以到安靜區平復心情。虞楟話，期望可以提供一個舒適環境畀呢班小朋友安心咁睇表演。
家長吳先生話，佢5歲嘅細仔喺言語表達能力方面稍遜，情緒會容易失控。吳先生提到細仔睇過其他音樂劇表演，音量較大時情緒就會受影響，佢認為迪士尼推出「輕鬆自在場」，可以讓小朋友更快適應同投入觀賞舞台表演。
