华侨网,有态度的华人新闻网站!

帮助中心 广告联系

華僑時報 | 華僑網

热门关键词:  央行  发顺丰  蓝狐  詩詞  习近平

安全岛与豆钉交通警

来源:网络整理 作者:华侨时报 发布时间:2018-05-08
摘要:计我话,安全岛可能信唔过,但小豆钉嘅公德心绝对系守护一个城市嘅重要力量。嘅然豆钉咁有威力,如果揾佢哋做

原标题:安全岛与豆钉交通警

企喺边度

□ 麦荣浩专栏

香港有两百几个岛,最大嘅系大屿山,仲大过香港岛,喺佢身上搞个新机场再搞个迪士尼,都只佔冰山一角。噉香港最细嘅岛有几细?听讲有啲岛等同一旧石,草都唔多条。不过噉都未算细。香港有一种岛,只够企两个人。呢种岛遍布全港各地,叫做安全岛。

安全岛位于马路中间,有一个半身高嘅灯塔,白头黄身,矮矮胖胖,有啲似星球大战嗰个同主角好frien嘅小机械人。通常一条马路太阔,就会喺中间摆一个安全岛,方便大家喺危险之地有一个相对安全嘅停留地。最记得,细个过马路,阿妈话:“记得睇车,望咗望右,咪以为企喺安全岛就一定安全呀!”唔系掛?如果唔系百分百安全,点解要改个咁安全嘅名?阿妈伸手指一指:“你睇下对面……”顺着望去,惊见一架交通失事撞到甩皮甩骨嘅私家车,系香港政府用嚟吓我地嘅,旁边写着“马路危险,不容冒险”。

嗰架甩皮甩骨嘅车真系吓亲我,所以我由细到大过马路都打醒十二分精神,每次企喺安全岛,就算完全冇车都猛咁扭咗扭右扭到颈都甩。而家人大咗,冇咁易畀人吓,间中仲会偷下鸡。嗰朝一早起身,过马路,去到安全岛;见冇车,搏大雾,红灯照过。突然,对面马路杀出个五六岁嘅豆钉,一掌向前打出,成个超人咁,向我大声叫:“红灯唔可以过马路!”我畀佢吓醒,企定喺安全岛唔敢郁,向佢鞠咗个九十度嘅躬,讲:“对唔住。”小豆钉见我咁听教,好满意噉走咗。

八十年代以嚟,香港嘅社会道德,主要唔系靠政府宣传或者市民嘅自律性,而系小朋友反过嚟对成年人嘅教育。小朋友小豆钉,好在是非黑白分明,最直接相信并实践香港嘅公共道德。“不准乱抛垃圾”、“不准冲红灯”、“地铁唔准食嘢”、“公平公正公开”,喺小朋友心目中系香港人嘅基本核心价值。好多大人都畀自己嘅仔仔孙孙教育成良好市民。

计我话,安全岛可能信唔过,但小豆钉嘅公德心绝对系守护一个城市嘅重要力量。嘅然豆钉咁有威力,如果揾佢哋做交通警,会唔会令大家变得遵守交通规则?如果揾佢哋做法官,会唔会令社会更公平?喺香港嘅各小学中学附近,每到午饭同放学,总会有一班穿着以蓝色同白色为主色嘅制服嘅细路,浩浩荡荡拉绳同举牌维持交通秩序。呢种时段,再唔守交通规则嘅街坊都会乖乖听话。如果广州有豆钉小警察,广州会唔会变得更好?

责任编辑:华侨时报